EN हिंदी
فکر تعمیر آشیاں بھی ہے | شیح شیری
fikr-e-tamir-e-ashiyan bhi hai

غزل

فکر تعمیر آشیاں بھی ہے

ناصر کاظمی

;

فکر تعمیر آشیاں بھی ہے
خوف بے مہری خزاں بھی ہے

خاک بھی اڑ رہی ہے رستوں میں
آمد صبح کا سماں بھی ہے

رنگ بھی اڑ رہا ہے پھولوں کا
غنچہ غنچہ شرر فشاں بھی ہے

اوس بھی ہے کہیں کہیں لرزاں
بزم انجم دھواں دھواں بھی ہے

کچھ تو موسم بھی ہے خیال انگیز
کچھ طبیعت مری رواں بھی ہے

کچھ ترا حسن بھی ہے ہوش ربا
کچھ مری شوخی بیاں بھی ہے

ہر نفس شوق بھی ہے منزل کا
ہر قدم یاد رفتگاں بھی ہے

وجہ تسکیں بھی ہے خیال اس کا
حد سے بڑھ جائے تو گراں بھی ہے

زندگی جس کے دم سے ہے ناصرؔ
یاد اس کی عذاب جاں بھی ہے