Kasrat-e-jalwa ko aaina-e-wahdat samjho

kasrat-e-jalwa ko aaina-e-wahdat samjho
jis ki surat nazar aae wahi surat samjho

gham ko gham aur na musibat ko musibat samjho
jo dar-e-dost se mil jae ghanimat samjho

jhuk ke jo sainkaDon fitnon ko jaga sakti hain
wo nigahen agar uTThen to qayamat samjho

nahin hote hain riya-kari ke sajde mujh se
main agar sar na jhukaun to ibaadat samjho

rafta rafta meri KHuddari se waqif hoge
abhi kuchh din mere andaz-e-mohabbat samjho

jalwa dekhoge kahan dil ke alawa apna
mere TuTe hue aaine ki qismat samjho

kam nahin dur asiri mein sahaara ye bhi
qaid mein yaad-e-nasheman ko ghanimat samjho

KHub samjhaya hai ye katib-e-qismat ne hamein
jo mayassar ho jahan mein use qismat samjho

ham-jafaon ko bhi andaz-e-inayat samjhen
aur tum shukr-e-sitam ko bhi shikayat samjho

meri aankhon mein abhi ashk bahut baqi hain
tum jo mahfil mein charaghon ki zarurat samjho

ai 'saba' kyun ho dar-e-ghair pe tauhin-talab
apne hi dar ko hamesha dar-e-daulat samjho