ایک تصویر جلانی ہے ابھی

ایک تصویر جلانی ہے ابھی
ہاں مگر آنکھ میں پانی ہے ابھی

اس نے جب ہاتھ ملایا تو لگا
دل میں اک پھانس پرانی ہے ابھی

ابھی باقی ہے بچھڑنا اس سے
نا مکمل یہ کہانی ہے ابھی

اے ہوا ایسی بھی عجلت کیا ہے؟
کیا کہیں آگ لگانی ہے ابھی

راستہ روک رہی ہے اک یاد
یہ بھی دیوار گرانی ہے ابھی

یہ جو پتھر ہیں انہیں ٹوٹنا ہے
میرے اشکوں میں روانی ہے ابھی

وقت یہ پوچھ رہا ہے طارقؔ
گرد کچھ اور اڑانی ہے ابھی؟