Dil o nazar mein tere rup ko basata hua

dil o nazar mein tere rup ko basata hua
teri gali se guzarta hun jagmagata hua

ghazal ke phul mere zehn mein mahakte hue
tera KHayal mujhe raat bhar jagata hua

wo bargah-e-adab hai aqidaton ki jagah
main us gali se kyun guzrunga KHak uData hua

mere junun se harifon ke panw ukhaDte hue
main jaan dene ke chakkar mein jaan bachata hua

kise mila tere qadmon mein jaan de dena
main sruKH-ru hua chahat ke kaam aata hua

tumhaari yaad mujhe is tarah se lagti hai
koi charag andhere mein jhilmilata hua

hatheliyon ki lakiren mujhe parakhti huin
main har qadam pe muqaddar ko aazmata hua

jawab kyun hain sabhi KHamoshi mein dubke hue
sawal zehn ke aangan mein aata jata hua

mere KHilaf sabhi sazishen rachin jis ne
wo ro raha hai meri dastan sunata hua

hamari samt lagatar war hote hue
use bachane mein aksar main choT khata hua