Dil kyun tapan hai kucha-e-dildar dekh kar

dil kyun tapan hai kucha-e-dildar dekh kar
aage baDhunga charKH ki raftar dekh kar

KHush ho saka na haal-e-dil-e-zar dekh kar
jalta hai ghair meri shab-e-tar dekh kar

samjhe na aap dida-e-KHun-bar dekh kar
kya kijiyega haal-e-dil-e-zar dekh kar

sayyaad dagh-e-dil na samajhna ki chalte waqt
gulshan ke phul laya hun do-chaar dekh kar

tai kar ke aaj KHana-badoshi ki manzilen
baiTha hun us ka saya-e-diwar dekh kar

kuchh kuchh zamana jaan gaya kar-e-husn-o-ishq
mansur ko jahan mein sardar dekh kar

waqf-e-zaban-e-ahl-e-hasad hai lahu mera
KHush ho raha hun wadi-e-pur-KHar dekh kar

patthar nahin ki tur ke daur aazmae jaen
ai barq-e-husn haal-e-dil-e-zar dekh kar

ab dahr ru-shana-o-wafa-o-jafa hua
mere gale par aap ki talwar dekh kar

mahshar mein koi puchhne wala to mil gaya
rahmat baDhi hai mujh ko gunahgar dekh kar

hai raushni qafas mein magar sujhta nahin
abr-e-siyah jaanib-e-gul-zar dekh kar

rota hun sham-e-gham mein dil-e-gum-shuda ko main
yaad aa rahi hai sham-e-shab-tar dekh kar

chaliye magar KHayal rahe umr-e-dahr ka
tham jae aasman na ye raftar dekh kar

rota hun waqt-e-nala guzarne se aur bhi
shab ko tulu-e-subh ke aasar dekh kar

bas ek din ki baat hai ai ishq-e-la-zawal
main kya karunga misr ka bazar dekh kar

kya tha ki aise waqt mein sahab-dilan-e-hashr
dekha kiye mujhe teri talwar dekh kar

sad-chaak dil ka zikr na bhula main der mein
tasbih yaad aa gai zunnar dekh kar

TuTe hain shisha-ha-e-dil itne ki ahl-e-dard
rakhte hain panw KHak pe sau bar dekh kar

sayyaad kis jagah pe qafas hai ki dil mera
dar ho raha hai bagh ki diwar dekh kar

in doston mein wo na hon yarab jo waqt-e-did
bimar ho gae ruKH-e-bimar dekh kar

wo kya samajh sakenge nasheb-o-faraaz-e-dahr
jo chal rahe hain rah ko hamwar dekh kar

kahte hain dil-lagi meri sham-e-firaq ko
achchha yunhi sahi magar ek bar dekh kar

'saqib' ajab nahin ki sar-e-tur-e-imtihan
ghash dil ko aae jalwa-e-ashaar dekh kar