dil dhaDakta hai to aati hain sadaen teri
meri sanson mein mahakne lagin sansen teri
chand KHud mahw-e-tamasha tha falak par us dam
jab sitaron ne utarin thin balaen teri
sher to rose hi kahte hain ghazal ke lekin
aa kabhi baiTh ke tujh se karen baaten teri
zehn-o-dil tere tasawwur se ghire rahte hain
mujh ko bahon mein liye rahti hain yaaden teri
kyun mera nam mere sher likhe hain in mein
chughliyan karti hain mujh se ye kitaben teri
be-KHabar oT se tu jhank raha ho hum ko
aur hum chupke se taswir bana len teri
Ghazal
Dil dhaDakta hai to aati hain sadaen teri
Nawaz Deobandi