دھول سے راہ اٹی ہو گئی منزل معدوم

دھول سے راہ اٹی ہو گئی منزل معدوم
کیا خبر کیا ہے مرے عزم سفر کا مقسوم

جسم آلودۂ عصیاں ہے مگر روح مری
کتنی پاکیزہ نظر آتی ہے کتنی معصوم

ڈھونڈ کر لاؤ کوئی حادثۂ قلب و نظر
شاید آئینہ ہو یوں زیست کا مخفی مفہوم

ترے پیکر کی جھلک دولت عالم ورنہ
رنگ اور نور کے اس سیل کی وقعت معلوم

صورت‌ حرف غلط مٹ گئے ہم تا کہ سدا
لوح دنیا پہ رہے نام تمہارا مرقوم

جرأت‌ جور و ستم کب تھی کسی میں نازشؔ
خود مرے ہاتھوں رہی ہے مری ہستی مظلوم