درد جوں شمع ملے ہے شب ہجراں مجھ کو

درد جوں شمع ملے ہے شب ہجراں مجھ کو
کھا گئے رو رو مرے دیدۂ گریاں مجھ کو

نو بہار آئی مبارک ہوئے جوں غنچہ و گل
خاطر جمع تجھے حال پریشاں مجھ کو

گر دم صبح شہیدان چمن سیر کرو
تیغ قاتل ہے دم منت احساں مجھ کو

جوں بگھولا ہے مجھے خجلت عصیاں دم فخر
بال پرواز ہوئے دست پشیماں مجھ کو

آفتاب‌ دل روشن دیا سودا نے مجھے
صبح ہادی ہوا یہ چاک‌ گریباں مجھ کو

دھن میں اس چشم کی روؤں جہاں نرگس آگے
سجدہ کرتے ہیں بیاباں میں غزالاں مجھ کو

مشت وحدت ہو بگھولے سا کروں اپنا طواف
گردش سر ہوا جام مئے عرفاں مجھ کو

دیکھ کر گال ترے زلف کے حلقے سے ہوئی
مطلع‌‌ صبح وطن شام غریباں مجھ کو

پوچھا قمری سے کسی نے ترا حاضر ہے سرو
بول کیوں کرتی ہے کوکو کی تو افغاں مجھ کو

تب کہی سرو ڈھونڈوں ہوں میں وفاداری میں
تن میں رکھتا ہے وفا آ کے جلا جاں مجھ کو

زاغ کو سر پہ بٹھاتے ہیں میں جل کر ہوئی راکھ
دوزخ اس رشک سے ہے خلد گلستاں مجھ کو

جام دے ساقی نو عزلتؔ کو کہ جاتی ہے بہار
رووے ہے فصل گل و ابر بہاراں مجھ کو