Chitwan ki kahun ki ishaaraat ki garmi

chitwan ki kahun ki ishaaraat ki garmi
hai nam-e-KHuda us mein har ek baat ki garmi

rone se mere us ko araq aa gaya yaro
sach hai ki buri hoti hai barsat ki garmi

Tuk phul chhua tha so nazakat se kai bar
rah rah ke dikhai mujhe gul-hat ki garmi

khulwate hi bundon ke badan garm ho aaya
shayad ki lagi us ko mere hat ki garmi

jalta hun main aur shoale nahin dete dikhai
hai ishq mein yaro ye tilismat ki garmi

rahna hai koi din to samajh jaiyo ai dil
yan phir wahi Thahri hai mulaqat ki garmi

garmi thi kahin aah hum afsurda-dilon mein
saqi ki faqat hai ye inayat ki garmi

aate hi jo tum mere gale lag gae wallah
us waqt to is garmi ne sab mat ki garmi

kahta hai wo jis dam ki chalo hum se na bolo
is baat mein hai aur hi ek baat ki garmi

sab poch hai zahir ki ye shoKHi-o-shararat
mashuq mein jab tak ki na ho zat ki garmi

tum ghussa ho ya qahr ho aatish ho ghazab ho
ab hum ne ye sab dil pe musawat ki garmi

ya-hazrat-e-dil tum to baDe sahib-e-dil the
rakhte the bahut apne kamalat ki garmi

ek hi nigah-e-garm se bas ho gae tum sard
ab kahiye kahan hai wo karamat ki garmi

yun garmi-e-sohbat to bahut hogi 'nazir' aah
par yar na bhulegi mujhe raat ki garmi