چھٹے غبار نظر بام طور آ جائے
پیو شراب کہ چہرہ پہ نور آ جائے
اٹھاؤ جام بنام حیات بادہ کشو
نظارے جھومیں نظر کو سرور آ جائے
شراب خانے میں کوثر کا ذکر کیا کہئے
کسی کی عقل میں جیسے فتور آ جائے
تمام زہد و ریاضت ہو غرق موج شراب
جو میکدے میں وہ شیدائے حور آ جائے
مقام دار سے گزرو تو زندگی پاؤ
پیو جو زہر ہلاہل سرور آ جائے
نگاہ تیز نفس گرم آرزو بے باک
جسے ہو ناز ہمارے حضور آ جائے
یہ کاروبار مشیت بھی خوب ہے تاباںؔ
کسی پہ برق گرے زد پہ طور آ جائے
غزل
چھٹے غبار نظر بام طور آ جائے
غلام ربانی تاباںؔ