chaha hai ajab Dhang se chahat bhi ajab hai
mahbub ajab hai ye mohabbat bhi ajab hai
pallu mera thama hai kai bar KHirad ne
par in dinon jazbon ki baghawat bhi ajab hai
jakDa hai teri yaad ne afkar ko mere
hamdam tere jazbaat mein shiddat bhi ajab hai
qurbat ke hasin phul meri ruh pe ware
kya KHub saKHi hai ye saKHawat bhi ajab hai
ek aariz-e-gul par jama shabnam sa wo qatra
kirnon se zara qabl rifaqat bhi ajab hai
lahja tera dhakka hua lagta hai ghazab ka
ghusse-bhare lahje mein hararat bhi ajab hai
chehra tera tapta hua dikhta hai tapish se
masti-bhare nainon mein shararat bhi ajab hai
bazi kabhi haari nahin zalim ne ana ki
chaalen bhi ajab us ki siyasat bhi ajab hai
KHud qaid-e-wafa kaT ke di us ko rihai
'bano' ye tere dil ki adalat bhi ajab hai
Ghazal
Chaha hai ajab Dhang se chahat bhi ajab hai
Saima Naseem bano