bulbulo baghban ko kyun chheDa
tum ne saz-e-fughan ko kyun chheDa
mujh ko us turk se ye shikwa hai
dil pe rakh kar sinan ko kyun chheDa
na bula lae mujh sa diwana
sangsar-e-jahan ko kyun chheDa
ai huma! aur khane the murde
mere hi ustuKHan ko kyun chheDa
bahla nadim ho ji mein kahta hai
main ne is momiyan ko kyun chheDa
phir gaya mujh se jo mizaj us ka
gardish-e-asman ko kyun chheDa
dur se us ne meri surat dekh
tosan-e-KHush-inan ko kyun chheDa
dastan apni mujh ko kahni thi
qissa-e-in-o-an ko kyun chheDa
qissa-KHwan aur lakh qisse the
tu ne zikr-e-butan ko kyun chheDa
jis se kal mujh ko aa gai thi ghashi
phir usi dastan ko kyun chheDa
'mushafi' ghar ke ghar jala dega
aise aatish-zaban ko kyun chheDa
Ghazal
Bulbulo baghban ko kyun chheDa
Mushafi Ghulam Hamdani