برگ ٹھہرے نہ جب ثمر ٹھہرے

برگ ٹھہرے نہ جب ثمر ٹھہرے
ایسے موسم پہ کیا نظر ٹھہرے

عہد کم مایہ کی نگاہوں میں
کاغذی پھول معتبر ٹھہرے

جن کو دعویٰ تھا بے کرانی کا
وہ سمندر بھی بوند بھر ٹھہرے

وہ گیا بھی تو اس کی یادوں کے
کتنے مہمان میرے گھر ٹھہرے

کوئی اپنے لئے بھی ٹھہرے گا
ہم کسی کے لئے اگر ٹھہرے

ہم کھرے تھے دمک اٹھے ورنہ
کس میں ہمت کہ آگ پر ٹھہرے

موت ہے جستجو مسافر کی
ایک لمحہ جو بے خبر ٹھہرے

پوچھ ان سے ہے سخت جانی کیا
آندھیوں میں بھی جو شجر ٹھہرے

خوش ہو دنیا کہ ہم تری خاطر
بزم یاراں میں بے ہنر ٹھہرے

جن سے آصفؔ ہمیں توقع تھی
رابطے وہ بھی مختصر ٹھہرے