بہت دنوں سے ہے جی میں سوال پوچھوں گا

بہت دنوں سے ہے جی میں سوال پوچھوں گا
میں تیرے آئنے سے تیرا حال پوچھوں گا

بہت حسیں ہے یہ دنیا مگر زوال کے ساتھ
خدا سے حشر میں حسن زوال پوچھوں گا

سکوت شام سے کیوں نسبت طبیعت ہے
سکوت شام سے وجہ ملال پوچھوں گا

تو بے مثال ہے تیری مثال کیا پوچھوں
میں کچھ نہیں مگر اپنی مثال پوچھوں گا

مرا خیال ہے میری نگاہ میں ہے جمال
ترے جمال کا کیا ہے خیال پوچھوں گا

خراب عکس ہیں شیشہ بدست کیوں ساقی
قصور بادۂ جام سفال پوچھوں گا

فضا اداس ہے جنگل کی سائیں سائیں ہے شاذؔ
میں کس سے وحشت چشم غزال پوچھوں گا