بدن کو وجد ترے بے حساب و حد آئے

بدن کو وجد ترے بے حساب و حد آئے
مری رسائی میں گر تیرا جزر و مد آئے

میں اک دفعہ تجھے چوموں تو تیرے خوابوں میں
کسی بھی مرد کا چہرہ نہ تا ابد آئے

میں تیغ عشق سے گر تول دوں بدن تیرا
تری نظر میں نہ میزان نیک و بد آئے

جو تیرے خواب میں آ جائے برشگال مرا
مرے لیے نہ ترے لب پہ رد و کد آئے

ہر ایک سال مناؤں میں جشن لمس اس کا
جو دسترس میں مری وہ دراز قد آئے

بہت سجے گی یہ پوشاک حرف اے کاشفؔ
جو شاعری میں مری اس کے خال و خد آئے