Baat kuchh humse ban na aai aaj

baat kuchh hum se ban na aai aaj
bol kar hum ne munh ki khai aaj

chup par apni bharam the kya kya kuchh
baat bigDi bani banai aaj

shikwa karne ki KHu na thi apni
par tabiat hi kuchh bhar aai aaj

bazm saqi ne di ulaT sari
KHub bhar bhar ke KHum lunDhai aaj

masiyat par hai der se ya rab
nafs aur sharaa mein laDai aaj

ghaalib aata hai nafs-e-dun ya shara
dekhni hai teri KHudai aaj

chor hai dil mein kuchh na kuchh yaro
nind phir raat bhar na aai aaj

zad se ulfat ki bach ke chalna tha
muft 'haali' ne choT khai aaj