ai dil wo aashiqi ke fasane kidhar gae
wo umr kya hui wo zamane kidhar gae
viran hain sahn o bagh bahaaron ko kya hua
wo bulbulen kahan wo tarane kidhar gae
hai najd mein sukut hawaon ko kya hua
lailaen hain KHamosh diwane kidhar gae
ujDe paDe hain dasht ghazalon pe kya bani
sune hain kohsar diwane kidhar gae
wo hijr mein visal ki ummid kya hui
wo ranj mein KHushi ke bahane kidhar gae
din raat mai-kade mein guzarti thi zindagi
'aKHtar' wo be-KHudi ke zamane kidhar gae
Ghazal
Ai dil wo aashiqi ke fasane kidhar gae
Akhtar Shirani