اگر اس کا مرا جھگڑا یہیں طے ہو تو اچھا ہو

اگر اس کا مرا جھگڑا یہیں طے ہو تو اچھا ہو
خدا جانے خدا کے سامنے کل کیا نہ ہو کیا ہو

گزرتی ہے بشر کی زندگی کس وہم باطل میں
جو ایسا ہو تو ایسا ہو جو ایسا ہو تو ایسا ہو

شب خلوت یہ کہنا بار بار اس کا بناوٹ سے
ہمیں چھیڑے تو غارت ہو ہمیں دیکھے تو اندھا ہو

وہ ہر دم کی عیادت سے مری گھبرا کے کہتے ہیں
غضب میں جان ہے اپنی نہ مر جائے نہ اچھا ہو

وہ فرماتے ہیں مجھ کو دیکھ کر میں یوں نہ مانوں گا
اگر یہ نوحؔ ہے طوفان اٹھائے غرق دنیا ہو