ابھی ہوس کے ہزاروں بہانے زندہ ہیں

ابھی ہوس کے ہزاروں بہانے زندہ ہیں
نئی رتوں میں شجر سب پرانے زندہ ہیں

فضائے مہر و محبت کی داغداری کو
دھواں اگلتے ہوئے کارخانے زندہ ہیں

مجاوران تمنا تو مر گئے کب کے
درون جسم کئی آستانے زندہ ہیں

جواز کوئی نہیں ہجرتوں سے بچنے کا
ہم اس دیار میں کس کے بہانے زندہ ہیں

عجب طلسم ہے جنگل کے ان درختوں کا
پرندے مر بھی چکے آشیانے زندہ ہیں

کھدائیوں میں ملے گا گدائے عشق کا تاج
سر زمیں تو ہوس کے زمانے زندہ ہیں