آوے جو ناز سے مرا وہ بت سیم بر بہ بر

آوے جو ناز سے مرا وہ بت سیم بر بہ بر
کاہے کو لے پھرے مجھے میرا نصیب در بدر

چشم بہ چشم رو بہ رو سینہ بہ سینہ دل بہ دل
ساق بہ ساق و لب بہ لب پائے بہ پائے سر بسر

تم تو رہو ہو مہرباں غیر کے ساتھ اس طرح
اور میں پھروں ہوں خوار و زار خانہ بہ خانہ گھر بہ گھر

اے بت مہروش کبھی ٹک تو نگاہ گرم ہو
اشک سے کب تلک رہیں دامن و جیب تر بہ تر

دام بلا سے اب بقاؔ ہم سے اسیر کب چھٹیں
رشتۂ غم سے گتھ گئے بال بہ بال پر بہ پر