Aashiq-e-zulf-o-ruKH-e-dildar aankhen ho gain

aashiq-e-zulf-o-ruKH-e-dildar aankhen ho gain
mubtala-e-kafir-o-dindar aankhen ho gain

surKH palken ho gain KHun-bar aankhen ho gain
dekh lo ab zaKHm-e-daman-dar aankhen ho gain

dekh kar mahw-e-jamal-e-yar aankhen ho gain
jam-ha-e-sharbat-e-didar aankhen ho gain

aaiyo ai ashk ab bahne laga hai KHun-e-garam
bhejiyo pani ki aatish-bar aankhen ho gain

laD gain tum se jo aankhen ho gai ek bar sulh
kijiye do-tin baaten chaar aankhen ho gain

kashti-e-mai le ke ai saqi pahunch bahr-e-KHuda
be tere mahfil mein dariya-bar aankhen ho gain

hai tasawwur bas-ki aankhon mein KHat-e-ruKHsar ka
aaine ki tarah jauhar-dar aankhen ho gain

ai but-e-kafir hai bas be-aib zat allah ki
lab tere isa hue bimar aankhen ho gain

bah gain palken ba-rang-e-KHas meri ashkon ke sath
ab to nazron mein gul-e-be-KHar aankhen ho gain

chashm-e-baddur in ko gardish hai ajab andaz se
ai pari aahu-e-KHush-raftar aankhen ho gain

mere panw ki tarah haihat ab gardish mein hain
kis ki ye warafta-e-raftar aankhen ho gain

ain nadani hai ab un se jo rakhiye chashm-dasht
shakl-e-mizhgan phir gain bezar aankhen ho gain

laKHt-e-dil yaqut mein aansu hain moti aab-dar
aao dekho jauhari bazar aankhen ho gain

do to hain chashm-e-suKHan-go gar nahin hai ek dahan
chup na rahiye qabil-e-guftar aankhen ho gain

ishq-e-pinhan dida-e-giryan ne zahir kar diya
hansne ki ja hai lab-e-izhaar aankhen ho gain

ablaq-e-chashm-e-sanam kis naz se gardish mein hai
KHub kawe hote hain rahwar aankhen ho gain

har kisi ne aankh jab Dali gulu-e-saf par
hans ke farmaya gale ka haar aankhen ho gain

tol lete hain sada nazron mein jins-e-husn ko
palla-e-mizan meri ai yar aankhen ho gain

hai tasawwur roz-o-shab kis ki tilai rang ka
chashm-e-nargis ki tarah zardar aankhen ho gain

kahte ho sab dekhte hain teri aankhon se mujhe
sach kaho aghyar ki bekar aankhen ho gain

chaliye ab sahra se ku-e-yar unhen dikhlaiye
aablon se panw mein do-chaar aankhen ho gain

phul nargis ke banae kab wahan meamar ne
ye hamari naqsh-bar-diwar aankhen ho gain

ai KHuda shahid hamara summa-wajhullah hai
jab nigah ki but pe tujh se chaar aankhen ho gain

aap sa in ko banaya ishq-e-tir-e-yar ne
hai siri tar-e-nigah sufar aankhen ho gain

pesh-e-nargis hath phailae hain shaKHon se daraKHt
kis ko dekhenge jo ab darkar aankhen ho gain

chup khaDe hain ban gae hain naqsh-bar-diwar hum
aao dekho rauzan-e-diwar aankhen ho gain

saqi-o-mina-o-saghar ek aate hain nazar
baada-e-wahdat se kya sarshaar aankhen ho gain

rote rote hijr mein suje hain ye chashman-e-tar
jism laghar ho gaya tayyar aankhen ho gain

aashiq-e-abru hun karna dida-o-danista qatl
jauharon se tujh mein ai talwar aankhen ho gain

aankh ke Doron ne tere kuchh to hain dhage diye
ai sanam jo mail-e-zunnar aankhen ho gain

phir gaya wo aa ke ab jage to kya hasil 'wazir'
so gae jab baKHt tab bedar aankhen ho gain