aae the ghar mein aag lagane sharir log
aur hans rahe the dur khaDe be-zamir log
himmat kahan hai mujh mein ki sach bol kar dikhaun
baiThe hue hain joDe kamanon mein tir log
har aadmi ke lab pe hai ek dil-shikan sawal
aaKHir kahan chale gae wo dil-pazir log
ek rose kah diya tha haqir inkisar mein
ye baat sach samajh gae sare haqir log
dast-e-talab daraaz karen bhi to kya karen
dekhe gae hain dast-nigar dast-gir log
jo puchhna hai puchh le aur chhoD rasta
Tikte nahin kisi bhi jagah hum faqir log
barpa kiya gaya tha gharibi miTao jashn
shamil the is mein shahr ke sare amir log
Ghazal
Aae the ghar mein aag lagane sharir log
Asghar Mehdi Hosh