Aa jao ab to zulf pareshan kiye hue

aa jao ab to zulf pareshan kiye hue
hum rah par hain shama farozan kiye hue

mayus qalb hai teri aamad ka muntazir
dahliz par nigah ko chaspan kiye hue

ahd-e-wafa ko toD ke hum bhi hain muzmahil
tum bhi udhar ho chaak gareban kiye hue

aao to mere sahn mein ho jae raushni
muddat guzar gai hai charaghan kiye hue

baiThe hain tishna-kaam sar-e-rahguzar tamam
saqi teri sharab ka arman kiye hue

aa jao ki bahaar hai apne shabab par
'ibn-e-chaman' ke wasl ka saman kiye hue