so dekh kar tere ruKHsar o lab yaqin aaya
ki phul khilte hain gulzar ke alawa bhi

Ahmad Faraz

---

---

jo un ko lipTa ke gal chuma haya se aane laga pasina
hui hai boson ki garm bhaTTi khinche na kyunkar sharab-e-ariz

Ahmad Husain Mail

---

---

jaane kis dam nikal aae tere ruKHsar ki dhup
muddaton dhyan tere saya-e-dar par rakkha

Ahmad Mushtaq

---

---

muddat se ek laDki ke ruKHsar ki dhup nahin aai
is liye mere kamre mein itni ThanDak rahti hai

Bashir Badr

---

---

hajat nahin banao ki ai naznin tujhe
zewar hai sadgi tere ruKHsar ke liye

Haidar Ali Aatish

---

---

qamat teri dalil qayamat ki ho gai
kaam aaftab-e-hashr ka ruKHsar ne kiya

Haidar Ali Aatish

---

---

uKHsar par hai rang-e-haya ka farogh aaj
bose ka nam main ne liya wo nikhar gae

Hakim Mohammad Ajmal Khan Shaida

---

---