chup raho to puchhta hai KHair hai
lo KHamoshi bhi shikayat ho gai

Akhtar Ansari Akbarabadi

---

---

use bechain kar jaunga main bhi
KHamoshi se guzar jaunga main bhi

Ameer Qazalbash

---

---

ek din meri KHamushi ne mujhe
lafz ki oT se ishaara kiya

Anjum Saleemi

---

---

khuli zaban to zarf un ka ho gaya zahir
hazar bhed chhupa rakkhe the KHamoshi mein

Anwar Sadeed

---

---

mohabbat soz bhi hai saz bhi hai
KHamoshi bhi hai ye aawaz bhi hai

Arsh Malsiyani

---

---

KHamoshi meri mani-KHez thi ai aarzu kitni
ki jis ne jaisa chaha waisa afsana bana Dala

Arzoo Lakhnavi

---

---

ajib shor machane lage hain sannaTe
ye kis tarah ki KHamoshi har ek sada mein hai

Asim Wasti

---

---