sabr par dil ko to aamada kiya hai lekin
hosh uD jate hain ab bhi teri aawaz ke sath

Aasi uldani

---

---

ye bhi ejaz mujhe ishq ne baKHsha tha kabhi
us ki aawaz se main dip jala sakta tha

Ahmad Khayal

---

---

gum raha hun tere KHayalon mein
tujh ko aawaz umr bhar di hai

Ahmad Mushtaq

---

---

maut KHamoshi hai chup rahne se chup lag jaegi
zindagi aawaz hai baaten karo baaten karo

Ahmad Mushtaq

---

---

ek aawaz ne toDi hai KHamoshi meri
DhunDhta hun to pas-e-sahil-e-shab kuchh bhi nahin

Alimullah Hali

---

---

mohabbat soz bhi hai saz bhi hai
KHamoshi bhi hai ye aawaz bhi hai

Arsh Malsiyani

---

---

mujh se jo chahiye wo dars-e-basirat lije
main KHud aawaz hun meri koi aawaz nahin

Asghar Gondvi

---

---