aunaq-e-baada-parasti thi hamin tak jab se
hum ne ki tauba kahin nam-e-KHarabaat nahin

Qayem Chandpuri

---

---

sang ko aab karen pal mein hamari baaten
lekin afsos yahi hai ki kahan sunte ho

Qayem Chandpuri

---

---

sair us kuche ki karta hun ki jibril jahan
ja ke bola ki bas ab aage main jal jaunga

Qayem Chandpuri

---

---

shamat hai kya ki shaiKH se koi mile ki wan
roza wabaal-e-jaan hai sada ya namaz hai

Qayem Chandpuri

---

---

shaiKH-ji aaya na masjid mein wo kafir warna hum
puchhte tum se ki ab wo parsai kya hui

Qayem Chandpuri

---

---

shaiKH-ji kyunki maasi se bachen hum ki gunah
irs hai apni hum aadam ke agar pote hain

Qayem Chandpuri

---

---

shaiKH-ji mana main is ko tum farishta ho to ho
lek hazrat-admi hona nihayat dur hai

Qayem Chandpuri

---

---