kaun hai jo har lamha suraten badalta hai
main kise samajhne ke marhalon mein zinda hun

Najmus Saqib

---

---

main hi TuT ke bikhra aur na roya wo
ab ke hijr ke mausam kitne jhuTe the

Najmus Saqib

---

---

mere hath mein tere nam ki wo lakir miTti chali gai
mere chaara-gar mere dard ki hi wazahaton mein lage rahe

Najmus Saqib

---

---

phir ek bar laDai thi apni suraj se
hum aainon ki tarah phir yahan wahan TuTe

Najmus Saqib

---

---

tujh bin KHali rah kar kitne sal bitane honge
mere hathon mein teri taqdiren kab utrengi

Najmus Saqib

---

---

use be-numu kisi KHwab ne kahin gahri nind sula diya
use bha gai hain kahawaten use bhi qafas mein sukun hai

Najmus Saqib

---

---

ye jism TuT ke hisson mein baTne wala hai
phir is pe apni riwayat kuchh nahin hoga

Najmus Saqib

---

---