kabhi dard ki tamanna kabhi koshish-e-mudawa
kabhi bijliyon ki KHwahish kabhi fikr-e-ashiyana

Moin Ahsan Jazbi

---

---

kya matam un ummidon ka jo aate hi dil mein KHak huin
kya roe falak un taron par dam bhar jo chamak kar TuT gae

Moin Ahsan Jazbi

---

---

marne ki duaen kyun mangun jine ki tamanna kaun kare
ye duniya ho ya wo duniya ab KHwahish-e-duniya kaun kare

Moin Ahsan Jazbi

---

---

meri arz-e-shauq be-mani hai un ke waste
un ki KHamoshi bhi ek paigham hai mere liye

Moin Ahsan Jazbi

---

---

meri hi nazar ki masti se sab shisha-o-saghar raqsan the
meri hi nazar ki garmi se sab shisha-o-saghar TuT gae

Moin Ahsan Jazbi

---

---

mile mujh ko gham se fursat to sunaun wo fasana
ki Tapak paDe nazar se mai-e-ishrat-e-shabana

Moin Ahsan Jazbi

---

---

muKHtasar ye hai hamari dastan-e-zindagi
ek sukun-e-dil ki KHatir umr bhar taDpa kiye

Moin Ahsan Jazbi

---

---