aage tha dil hi mera ab hai khuda aap ka nam
zauq se samajhiye aap is ko nagina apna

Jurat Qalandar Bakhsh

---

---

aaj ghera hi tha use main ne
kar ke iqrar mujh se chhuT gaya

Jurat Qalandar Bakhsh

---

---

aalam-e-masti mein mere munh se kuchh nikla jo raat
bol uTha tewari chaDha kar wo but-e-mai-KHwar chup

Jurat Qalandar Bakhsh

---

---

aaluda-ba-KHun chashm se Tapke hai jo aansu
sab kahte hain hairat se ye moti hai ki munga

Jurat Qalandar Bakhsh

---

---

aastin-e-mauj dariya se juda hoti nahin
rabt tera chashm se kyun aastin jata raha

Jurat Qalandar Bakhsh

---

---

aaya tha shab ko chhup ke wo rashk-e-chaman so aah
phaili ye ghar mein bu ki mohalla mahak gaya

Jurat Qalandar Bakhsh

---

---

ahwal kya bayan main karun hae ai tabib
hai dard us jagah ki jahan ka nahin ilaj

Jurat Qalandar Bakhsh

---

---