kis tarah dur hon aalam-e-gharib-ul-watani
zindagi KHud bhi gharib-ul-watani hoti hai

Josh Malsiani

---

---

mohabbat kahan ye to bechaargi hai sitam bhi sahen phir karam is ko samjhen
ye jabr is liye kar liya hai gawara ki is ke siwa koi chaara na dekha

Josh Malsiani

---

---

naqsh-e-ulfat miT gaya to dagh-e-ulfat hain bahut
shukr kar ai dil ki tere ghar ki daulat ghar mein hai

Josh Malsiani

---

---

pi loge to ai shaiKH zara garm rahoge
ThanDa hi na kar den kahin jannat ki hawaen

Josh Malsiani

---

---

soz-e-gham hi se meri aankh mein aansu aae
sochta hun ki ise aag kahun ya pani

Josh Malsiani

---

---

un ke aane ki KHushi kya chiz thi
is KHushi se aur gham paida hua

Josh Malsiani

---

---

wahi marne ki tamanna wahi jine ki hawas
na jafaen tumhein aain na wafaen aain

Josh Malsiani

---

---