mere ghar se ziyaada dur sahra bhi nahin lekin
udasi nam hi leti nahin bahar nikalne ka

Iqbal Sajid

---

---

mere hi harf dikhate the meri shakl mujhe
ye ishtihaar mere ru-ba-ru bhi hona tha

Iqbal Sajid

---

---

mom ki siDhi pe chaDh kar chhu rahe the aaftab
phul se chehron ko ye koshish bahut mahngi paDi

Iqbal Sajid

---

---

mujh pe patthar phenkne walon ko tere shahr mein
narm-o-nazuk hath bhi dete hain patthar toD ka

Iqbal Sajid

---

---

musalsal jagne ke baad KHwahish ruTh jati hai
chalan sikha hai bachche ki tarah us ne machalne ka

Iqbal Sajid

---

---

paDhte paDhte thak gae sab log tahriren meri
likhte likhte shahr ki diwar kali ho gai

Iqbal Sajid

---

---

pichhle baras bhi boi thin lafzon ki khetiyan
ab ke baras bhi is ke siwa kuchh nahin kiya

Iqbal Sajid

---

---