kuchh aise zaKHm bhi dar-parda hum ne khae hain
jo hum ne apne rafiqon se bhi chhupae hain

Iqbal Azeem

---

---

mere jurm-e-wafa ka faisla kuchh is tarah hoga
saza ka hukm fauri aur samaat sarsari hogi

Iqbal Azeem

---

---

pursish-e-haal ki fursat tumhein mumkin hai na ho
pursish-e-haal tabiat ko gawara bhi nahin

Iqbal Azeem

---

---

qatil ne kis safai se dhoi hai aastin
us ko KHabar nahin ki lahu bolta bhi hai

Iqbal Azeem

---

---

aushni mujh se gurezan hai to shikwa bhi nahin
mere gham-KHane mein kuchh aisa andhera bhi nahin

Iqbal Azeem

---

---

safar pe nikle hain hum pure ehtimam ke sath
hum apne ghar se kafan sath le ke aae hain

Iqbal Azeem

---

---

yun sar-e-rah mulaqat hui hai aksar
us ne dekha bhi nahin hum ne pukara bhi nahin

Iqbal Azeem

---

---