hum KHud bhi hue nadim jab harf-e-dua nikla
samjhe the jise patthar wo shaKHs KHuda nikla

Hilal Fareed

---

---

is aql ki mari nagri mein kabhi pani aag nahin banta
yahan ishq bhi log nahin karte yahan koi kamal nahin hota

Hilal Fareed

---

---

jam-e-ishq pi chuke zindagi bhi ji chuke
ab 'hilal' ghar chalo ab to sham ho gai

Hilal Fareed

---

---

jab waqt paDa tha to jo kuchh hum ne kiya tha
samjhe the wahi yar hamara bhi karega

Hilal Fareed

---

---

meri dastan bhi ajib hai wo qadam qadam mere sath tha
jise raaz-e-dil na bata saka jise dagh-e-dil na dikha saka

Hilal Fareed

---

---

na hi bijliyan na hi barishen na hi dushmanon ki wo sazishen
bhala kya sabab hai bata zara jo tu aaj bhi nahin aa saka

Hilal Fareed

---

---

pani pe bante aks ki manind hun magar
aankhon mein koi bhar le to miTta nahin hun main

Hilal Fareed

---

---