isi ummid par to ji rahe hain hijr ke mare
kabhi to ruKH se uTThegi naqab aahista aahista

Hashim Ali Khan Dilazak

---

---

gareban chaak, dhuan, jam, hath mein cigarette
shab-e-firaq, ajab haal mein paDa hua hun

Hashim Raza Jalalpuri

---

---

hum be-niyaz baiThe hue un ki bazm mein
auron ki bandagi ka asar dekhte rahe

Hashim Raza Jalalpuri

---

---

hum se aabaad hai ye sher-o-suKHan ki mahfil
hum to mar jaenge lafzon se kinara kar ke

Hashim Raza Jalalpuri

---

---

mahfil mein log chaunk paDe mere nam par
tum muskura diye meri qimat yahi to hai

Hashim Raza Jalalpuri

---

---

sari ruswai zamane ki gawara kar ke
zindagi jite hain kuchh log KHasara kar ke

Hashim Raza Jalalpuri

---

---

aur thoDa sa bikhar jaun yahi Thani hai
zindagi main ne abhi haar kahan mani hai

Hasnain Aaqib

---

---