hammam ke aaine mein shab Dub rahi thi
cigarette se nae din ka dhuan phail raha tha

Adil Mansuri

---

---

cigarette jise sulagta hua koi chhoD de
us ka dhuan hun aur pareshan dhuan hun main

Ameeq Hanafi

---

---

gareban chaak, dhuan, jam, hath mein cigarette
shab-e-firaq, ajab haal mein paDa hua hun

Hashim Raza Jalalpuri

---

---

kamre mein phailta raha cigarette ka dhuan
main band khiDkiyon ki taraf dekhta raha

Kafeel Aazar Amrohvi

---

---

mujh se mat bolo main aaj bhara baiTha hun
cigarette ke donon paikeT bilkul KHali hain

Muzaffar Hanfi

---

---

hue KHatm cigarette ab kya karen hum
hai pichhla pahar raat ke do baje hain

Razzaq Arshad

---

---

ab ma-hasal hayat ka bas ye hai ai 'salam'
cigarette jalai sher kahe shadman hue

Salam Machhli shahri

---

---