chaman mein dekhte hi paD gai kuchh os ghunchon par
tere bustan pe aalam hai ajab shabnam ke mahram ka
Shah Naseer
chaman mein ghuncha munh khole hai jab kuchh dil ki kahne ko
nasim-e-subh bhar rakhti hai baaton mein laga lipTa
Shah Naseer
dair-o-kaba mein tafawut KHalq ke nazdik hai
shahid-e-mani ka har surat hai ghar donon taraf
Shah Naseer
de mujh ko bhi is daur mein saqi sipar-e-jam
har mauj-e-hawa khinche hai shamshir hawa pa
Shah Naseer
dekh tu yar-e-baada-kash main ne bhi kaam kya kiya
de ke kabab-e-dil tujhe haqq-e-namak ada kiya
Shah Naseer
dekhoge ki main kaisa phir shor machata hun
tum ab ke namak mere zaKHmon pe chhiDak dekho
Shah Naseer
dila us ki kakul se rakh jama KHatir
pareshan se hasil kab ek dam hoga
Shah Naseer
dil-e-pur-abla laya hun dikhane tum ko
band ai shisha-garo! apni dukan kijiyega
Shah Naseer
din raat yahan putliyon ka nach rahe hai
hairat hai ki tu mahw-e-tamasha nahin hota
Shah Naseer