har aan aa mujhi ko satate ho naseho
samjha ke tum use bhi to yak-bar kuchh kaho

Sauda Mohammad Rafi

---

---

har sang mein sharar hai tere zuhur ka
musa nahin jo sair karun koh tur ka

Sauda Mohammad Rafi

---

---

is kashmakash se dam ke kya kaam tha hamein
ai ulfat-e-chaman tera KHana-KHarab ho

Sauda Mohammad Rafi

---

---

ishq se to nahin hun main waqif
dil ko shoala sa kuchh lipaTta hai

Sauda Mohammad Rafi

---

---

jab yar ne uTha kar zulfon ke baal bandhe
tab main ne apne dil mein lakhon KHayal bandhe

Sauda Mohammad Rafi

---

---

jis roz kisi aur pe bedad karoge
ye yaad rahe hum ko bahut yaad karoge

Sauda Mohammad Rafi

---

---

kaam aai kohkan ki mashaqqat na ishq mein
patthar se ju-e-shir ke lane ne kya kiya

Sauda Mohammad Rafi

---

---

kahiyo saba salam hamara bahaar se
hum to chaman ko chhoD ke su-e-qafas chale

Sauda Mohammad Rafi

---

---

kahte the hum na dekh saken roz-e-hijr ko
par jo KHuda dikhae so na-chaar dekhna

Sauda Mohammad Rafi

---

---