mizaj alag sahi hum donon kyun alag hon ki hain
sarab o aab mein poshida qurbaten kya kya

Fuzail Jafri

---

---

jo bhar bhi jaen dil ke zaKHm dil waisa nahin rahta
kuchh aise chaak hote hain jo juD kar bhi nahin silte

Fuzail Jafri

---

---

kis dard se raushan hai siyah-KHana-e-hasti
suraj nazar aata hai hamein raat gae bhi

Fuzail Jafri

---

---

koi manzil aaKHiri manzil nahin hoti 'fuzail'
zindagi bhi hai misal-e-mauj-e-dariya rah-rau

Fuzail Jafri

---

---

main aur meri zat agar ek hi shai hain
phir barson se donon mein saf-arai si kyun hai

Fuzail Jafri

---

---

manzilen samten badalti ja rahi hain roz o shab
is bhari duniya mein hai insan tanha rah-rau

Fuzail Jafri

---

---

ye sach hai hum ko bhi khone paDe kuchh KHwab kuchh rishte
KHushi is ki hai lekin halqa-e-shar se nikal aae

Fuzail Jafri

---

---

zid mein duniya ki bahar-haal mila karte the
warna hum donon mein aisi koi ulfat bhi na thi

Fuzail Jafri

---

---

zahr miTha ho to pine mein maza aata hai
baat sach kahiye magar yun ki haqiqat na lage

Fuzail Jafri

---

---