aaj bhi 'sipra' us ki KHushbu mill malik le jata hai
main lohe ki naf se paida jo kasturi karta hun

Tanveer Sipra

---

---

aaj itna jalao ki pighal jae mera jism
shayad isi surat hi sukun pae mera jism

Tanveer Sipra

---

---

ab tak mere aasab pe mehnat hai musallat
ab tak mere kanon mein mashinon ki sada hai

Tanveer Sipra

---

---

ai raat mujhe man ki tarah god mein le le
din bhar ki mashaqqat se badan TuT raha hai

Tanveer Sipra

---

---

aurat ko samajhta tha jo mardon ka khilauna
us shaKHs ko damad bhi waisa hi mila hai

Tanveer Sipra

---

---

dihat ke wajud ko qasba nigal gaya
qasbe ka jism shahr ki buniyaad kha gai

Tanveer Sipra

---

---

hum hizb-e-iKHtilaf mein bhi mohtaram hue
wo eqtidar mein hain magar be-wiqar hain

Tanveer Sipra

---

---

jo kar raha hai dusron ke zehn ka ilaj
wo shaKHs KHud bahut baDa zehni mariz hai

Tanveer Sipra

---

---

kabhi apne wasael se na baDh kar KHwahishen palo
wo pauda TuT jata hai jo la-mahdud phalta hai

Tanveer Sipra

---

---