agarche phul ye apne liye KHaride hain
koi jo puchhe to kah dunga us ne bheje hain

Iftikhar Naseem

---

---

ahti rahi nadi mere ghar ke qarib se
pani ko dekhne ke liye main taras gaya

Iftikhar Naseem

---

---

diwar o dar jhulaste rahe tez dhup mein
baadal tamam shahr se bahar baras gaya

Iftikhar Naseem

---

---

fasl-e-gul mein bhi dikhata hai KHizan-dida-daraKHt
TuT kar dene pe aae to ghaTa jaisa bhi hai

Iftikhar Naseem

---

---

ghair ho koi to us se khul ke baaten kijiye
doston ka doston se hi gila achchha nahin

Iftikhar Naseem

---

---

hazar talKH hon yaaden magar wo jab bhi mile
zaban pe achchhe dinon ka hi zaiqa rakhna

Iftikhar Naseem

---

---

is qadar bhi to na jazbaat pe qabu rakkho
thak gae ho to mere kandhe pe bazu rakkho

Iftikhar Naseem

---

---

ji mein Thani hai ki jina hai bahar-haal mujhe
jis ko marna hai wo chup-chap hi marta jae

Iftikhar Naseem

---

---

jis ghaDi aaya palaT kar ek mera bichhDa hua
aam se kapDon mein tha wo phir bhi shahzada laga

Iftikhar Naseem

---

---