agarche us ki har ek baat khurduri hai bahut
mujhe pasand hai Dhang us ke baat karne ka

Hakeem Manzoor

---

---

apni nazar se TuT kar apni nazar mein gum hua
wo baDa ba-shuur tha apne hi ghar mein gum hua

Hakeem Manzoor

---

---

agh mein hona hi shayad seb ki pahchan thi
ab ki wo bazar mein hai ab to bikna hai use

Hakeem Manzoor

---

---

chhoD kar bar-e-sada wo be-sada ho jaega
wahm tha mera ki patthar aaina ho jaega

Hakeem Manzoor

---

---

dekhte hain dar-o-diwar harifana mujhe
itna be-bas bhi kahan hoga koi ghar mein kabhi

Hakeem Manzoor

---

---

giregi kal bhi yahi dhup aur yahi shabnam
is aasman se nahin aur kuchh utarne ka

Hakeem Manzoor

---

---

hum kisi bahrupiye ko jaan len mushkil nahin
us ko kya pahchaniye jis ka koi chehra na ho

Hakeem Manzoor

---

---

har ek aankh ko kuchh TuTe KHwab de ke gaya
wo zindagi ko ye kaisa azab de ke gaya

Hakeem Manzoor

---

---

itna badal gaya hun ki pahchanne mujhe
aaega wo to KHud se guzar kar hi aaega

Hakeem Manzoor

---

---