nahin khulta ki aaKHir ye tilismati tamasha sa
zamin ke is taraf aur aasman ke us taraf kya hai

Ejaz Gul

---

---

jo qissa-go ne sunaya wahi suna gaya hai
agar tha is se siwa to nahin kaha gaya hai

Ejaz Gul

---

---

kabhi qatar se bahar kabhi qatar ke bich
main hijr-zad hua KHarch intizar ke bich

Ejaz Gul

---

---

koi sabab to hai aisa ki ek umr se hain
zamana mujh se KHafa aur main zamane se

Ejaz Gul

---

---

kuchh der Thahar aur zara dekh tamasha
napaid hain ye raunaqen is KHak se baha

Ejaz Gul

---

---

main umr ko to mujhe umr khinchti hai ulaT
tazad samt ka hai asp aur sawar ke bich

Ejaz Gul

---

---

mashq-e-suKHan mein dil bhi hamesha se hai sharik
lekin hai is mein kaam ziyaada dimagh ka

Ejaz Gul

---

---

qismat ki KHarabi hai ki jata hun ghalat samt
paDta hai bayaban bayaban se aage

Ejaz Gul

---

---

uTha rakhi hai kisi ne kaman suraj ki
gira raha hai mere raat din nishane se

Ejaz Gul

---

---