chahiye kya tumhein tohfe mein bata do warna
hum to bazar ke bazar uTha laenge

Ata Turab

---

---

han tujhe bhi to mayassar nahin tujh sa koi
hai tera arsh bhi viran mere pahlu ki tarah

Ata Turab

---

---

ishq to apne lahu mein hi sanwarta hai so hum
kis liye ruKH pe koi ghaza laga kar dekhen

Ata Turab

---

---

kya kya na pyas jage mere dil ke dasht mein
hasrat bhi ek aag hai lage jo raat bha

Ata Turab

---

---

tarash aur bhi apne tasawwur-e-rab ko
tere KHuda se to behtar mera sanam hai abhi

Ata Turab

---

---

tufan-e-bahr KHak Daraata mujhe 'turab'
us se baDa bhanwar to safine ke bich tha

Ata Turab

---

---

wo ek suKHan hi hamari sanad na ban jae
wo ek suKHan jo tumhaari sanad nahin rakhta

Ata Turab

---

---

yun mohabbat se na hum KHana-ba-doshon ko bula
itne sada hain ki ghar-bar uTha laenge

Ata Turab

---

---