'aslam' baDe waqar se degree wasul ki
aur is ke baad shahr mein KHwancha laga liya

Aslam Kolsarii

---

---

hamari jit hui hai ki donon haare hain
bichhaD ke hum ne kai raat din guzare hain

Aslam Kolsarii

---

---

id ka din hai so kamre mein paDa hun 'aslam'
apne darwaze ko bahar se muqaffal kar ke

Aslam Kolsarii

---

---

jaane kis lamha-e-wahshi ki talab hai ki falak
dekhna chahe mere shahr ko jangal kar ke

Aslam Kolsarii

---

---

jab main us ke ganw se bahar nikla tha
har raste ne mera rasta roka tha

Aslam Kolsarii

---

---

kanTe se bhi nichoD li ghairon ne bu-e-gul
yaron ne bu-e-gul se bhi kanTa bana diya

Aslam Kolsarii

---

---

qarib aa ke bhi ek shaKHs ho saka na mera
yahi hai meri haqiqat yahi fasana mera

Aslam Kolsarii

---

---

shahr mein aa kar paDhne wale bhul gae
kis ki man ne kitna zewar becha tha

Aslam Kolsarii

---

---

sirf mere liye nahin rahna
tum mere baad bhi hasin rahna

Aslam Kolsarii

---

---