Main hun wo aankh jise KHun-e-jigar le Dube

main hun wo aankh jise KHun-e-jigar le Dube
main wo nala hun jise us ka asar le Dube

main hun wo raat sitare jise gahra kar den
main hun wo bazm jise raqs-e-sharar le Dube

wo mai-e-tund hun main jis se jigar char jae
main wo dariya hun jo apna hi guhar le Dube

wo sanam main ne tarashe ki KHuda chaunk uThe
main wo aazar hun jise mashq-e-hunar le Dube

gard ko bhi na pahunch sakte the rahzan jin ki
unhin manzil se bhi aage ke safar le Dube

wo jo phirte the KHabar tirgiyon ki lete
idhar aae to kai chand udhar le Dube

kaise KHamosh andheron mein chhupe baiThe hain
aise andher ki ummid-e-sahar le Dube

ibn-e-adam ki to bu tak na rahi galiyon mein
meri basti ko KHudaon ke ye ghar le Dube

nam-lewaon ko apne kabhi KHalwat mein parakh
is tamashe ko yahi shoabda-gar le Dube

mere hamraaz ne kya KHub kaha tha 'rahil'
tujhe mumkin hai yahi zauq-e-nazar le Dube