suna hai shahr ka naqsha badal gaya 'mahfuz'
to chal ke hum bhi zara apne ghar ko dekhte hain

Ahmad Mahfuz

---

---

hiD ke KHauf se phir ghar ki taraf lauT aaya
ghar se jab shahr mein tanhai ke Dar se nikla

Aleem Masroor

---

---

jo mere ganw ke kheton mein bhuk ugne lagi
mere kisanon ne shahron mein naukri kar li

Arif Shafiq

---

---

hai ajib shahr ki zindagi na safar raha na qayam hai
kahin karobar si dopahr kahin bad-mizaj si sham hai

Bashir Badr

---

---

tamam raat nahaya tha shahr barish mein
wo rang utar hi gae jo utarne wale the

Jamal Ehsani

---

---

dosto tum se guzarish hai yahan mat aao
is baDe shahr mein tanhai bhi mar jati hai

Javed Nasir

---

---

tum bhi is shahr mein ban jaoge patthar jaise
hansne wala yahan koi hai na rone wala

Kailash Mahir

---

---