koi taswir mukammal nahin hone pati
dhup dete hain to saya nahin rahne dete

Ahmad Mushtaq

---

---

log kahte hain ki saya tere paikar ka nahin
main to kahta hun zamane pe hai saya tera

Ahmad Nadeem Qasmi

---

---

wo aur honge jo kar-e-hawas pe zinda hain
main us ki dhup se saya badal ke aaya hun

Akbar Masoom

---

---

kab dhup chali sham Dhali kis ko KHabar hai
ek umr se main apne hi sae mein khaDa hun

Akhtar Hoshiyarpuri

---

---

saya bhi sath chhoD gaya ab to ai 'asar'
phir kis liye main aaj ko kal se juda karun

Asar Akbarabadi

---

---

zawiya dhup ne kuchh aisa banaya hai ki hum
sae ko jism ki jumbish se juda dekhte hain

Asim Wasti

---

---

aasman ek sulagta hua sahra hai jahan
DhunDhta phirta hai KHud apna hi saya suraj

Azad Gulati

---

---