jab us ne mera KHat na chhua hath se apne
qasid ne bhi chipka diya diwar se kaghaz

Peer Sher Mohammad Ajiz

---

---

KHat-e-shauq ko paDh ke qasid se bole
ye hai kaun diwana KHat likhne wala

Saail Dehlvi

---

---

phaD kar KHat us ne qasid se kaha
koi paigham zabani aur hai

Sardar Genda Singh Mashriqi

---

---

jawab-e-nama ya deta nahin ya qaid karta hai
jo bheja hum ne qasid phir na pai kuchh KHabar us ki

Shaikh Zahuruddin Hatim

---

---

qayamat hai ye kah kar us ne lauTaya hai qasid ko
ki un ka to har ek KHat aaKHiri paigham hota hai

Sheri Bhopali

---

---

qayamat hai ye kah ke us ne lauTaya hai qasid ko
ki un ka to har ek KHat aaKHiri paigham hota hai

Sheri Bhopali

---

---

dekh qasid ko mere yar ne puchha 'taban'
kya mere hijr mein jita hai wo ghamnak hanuz

Taban Abdul Hai

---

---