parinda jaanib-e-dana hamesha uD ke aata hai
parinde ki taraf uD kar kabhi dana nahin aata

Adeem Hashmi

---

---

jaane kya kya zulm parinde dekh ke aate hain
sham Dhale peDon par marsiya-KHwani hoti hai

Afzal Khan

---

---

khol diye kuchh soch kar sab pinjron ke dwar
ab koi panchhi nahin uDne ko tayya

Akhtar Nazmi

---

---

jaane kya soch ke phir in ko rihai de di
hum ne ab ke bhi parindon ko tah-e-dam kiya

Ambar Bahraichi

---

---

ek parinda abhi uDan mein hai
tir har shaKHs ki kaman mein hai

Ameer Qazalbash

---

---

parind kyun meri shaKHon se KHauf khate hain
ki ek daraKHt hun aur saya-dar main bhi hun

Asad Badayuni

---

---

parind peD se parwaz karte jate hain
ki bastiyon ka muqaddar badalta jata hai

Asad Badayuni

---

---